Xildhibaan sheegay in Xafiiska Madaxtooyada uu is hor-taag ku sameeyay shir ay lahaayeen
Waxaa soo baxaya tuhuno ku aadan in cida laheyd amarka lagu hor-istaagay shir maalin ka hor Mudanayaal ka tirsan Baarlamaanka ku lahaayeen mid ka mid ah Hotelada Muqdisho, iyadoo Hey'adda Nabadsugida qaranka ay iska fogeysay inay is hor-taagtay Xildhibaanadii shiri lahaa.
Xildhibaan Cabdi Bare Yuusuf Jibriil oo ka mid ah mudanayaasha baarlamaanka Soomaaliya oo saaka la hadlay qaar ka mid ah warbaahinta Muqdisho ayaa sheegay inay cadaatay shirka Xildhibaanada lagu hor-istaagay inuu ahaa amar ka soo baxay Madaxtooyada
"Waxaa cadaatay in shirka xildhibaanada laga hor istaagay uu ahaa amar ka soo baxay Madaxtooyada, waa la xisaabtami doona Madaxtooyada iyo cida amarka soo saartay"ayuu yiri Xildhibaan Cabdi Barre.
Sidoo kale Xildhibaanka ayaa sheegay in tallaabadan ay kula xisaabtamayaan Madaxtooyada, isla markaana Gudoonka Baarlamaanka ay u gudbinayaan dacwadaas sida uu yiri
"Cidii Xafiiska Madaxweynaha amarkaas ka soo bixisay in baarlamaanka la horkeeno, sharciga ayaa la jebiyay, xoriyatul qowlkii ayaa la jebiyay 110 xildhibaan ciyaar ma ahan in lagu tunto, hadaan wax laga qaban waa baarlamaan ma jiro"ayuu yiri.
Agaasimaha Hey'adda Nabadsugida Qaranka Gen. Bashiir Maxamed Jaamac (Bashiir Goobe) oo shalay shir jaraa'id ku qabtay magaalada Muqdisho ayaa beeniyay in Ciidamada nabadsugida ay is hor-taageen shirka Xildhibaanada, isagoo xusay in siyaasada Hey'adda Nabadsugida qaranka ay tahay ilaalinta karaamada iyo ammaanka Mas'uuliyiinta qaranka.
Labadii maalmood ee la soo dhaafay ayaa waxaa ka socotay Muqdisho hadal heynta ku saabsanaa shirka laga beneday Mudanayaasha Baarlamaanka, iyadoo la is weydiinayo Sarkaal ka tirsan Madaxtooyada awooda u leeyahay inuu hor istaago shir ay lahaayeen mid ka mid ah hey'adaha ugu sareeya dalka.
