Ciidamada dowladda iyo AMISOM oo saaka howlgalo ka wada degmooyin ka tirsan G/Banaadir
Ciidamada dowladda Soomaaliya iyo kuwa AMISOM ayaa saaka howl gal ka wada degmooyin ka tirsan Gobolka Banaadir, iyadoo wax dhaq dhaqaaq ah aysan ka jirin xaafadaha ciidamadu howl galka ka wadaan.
Howl galkan ayaa waxaa ka qeyb qaadnaaya ciidamada booliska iyo kuwa nabadsugida oo ay wehliyaan ciidamada AMISOM, iyadoo xalay saqdii dhexe hareereeyay xaafadaha howl galka lagu qaaday.
Ciidamada ayaa si gaar ah howl galka uga wada degmooyinka Howlwadaag iyo Wardhiigley, gaar ahaan Xaafadaha Xamar Jadiid, Labo Dhagax, xaafadaha ku dhow dhow Suuqa Bakaaraha iyo xaafadaha ku teedsan Jidka warshadaha.
Dadka deegaanka ayaa sheegaya in ay banaanka u bixi la'yihiin, isla markaana ay xiran yihiin dhamaan wadooyinka, waxaana ciidamada ay galayeen guryaha, kuwaasoo kala soo baxayay dhalinyarada.
Gawaarida loo yaqaano Shabaqlaha ayaa dadka howl galka lagu qab qabtay lagu soo daadgureynayay, kuwaasoo saldhigyada loo soo qaadayay.
Howl galkan ayay saraakiisha ammaanka ku tilmaameen mid ujeedkiisa yahay in lagu sugo ammaanka, iyadoo habeen hore weerar hoobiyeyaal lagu qaaday Xarunta Madaxtooyada Soomaaliya.
