Askari lagu dilay Xaafad ay ku badan yihiin Soomaalida oo ku taal Koofur bari London (Sawirro)
Askari ayaa lagu dilay koofur bari magaalada London Xaafad lagu magacaabo Woolwich, halkaasoo ay u badan yihiin Soomaalida, iyadoo weerarkan oo dhacay maalin cad lagu tilmaamay mid argagixiso.
Labo nin oo madow ahaa ayaa Mindi iyo faas ku dilay askari ka tirsan Ciidamada British oo ka soo baxay xero ku taal Woolwich, iyadoo booliska oo goobta soo gaaray ay labada nin dhaawaceen.
Wararka ayaa sheegaya in labada nin ee falkan geystay ay ka soo jeedaan dalka Nigeria, waxaana mid ka mid ah uu la hadlay haweeney goobta ku sugney, isagoo sheegaya in ciidamada Britain ay maalin walba dilaan dad Muslimiin ah, isagoo dhahayay Allahu Akbar.
Muuqaal laga duubay dhacdadan ayaa muujinayay, ninkan oo gacanta mindida ku heystay, dabadeedna dhiig ka muuqday.
Labada nin oo ay dhaawaceen booliska ayaa la dhigay Isbitaal ay ammaankiisa aad loo adkeeyay, waxaana socda baaritaano ku aadan falkan.
Ra'iisul Wasaaraha Britain David Cameroon ayaa soo gaba gabeeyay socdaal uu ku joogay magaalada Paris, isagoo sheegay in falkan uu ahaa mid naxdin leh.
Soomaalida ku nool xaafada Woolwich ayaa cabsi la soo deristay, iyadoo goor hore oo fiidkii ah ay dadka guryahooda ku kala xaroodeen, si aanay saameyn ugu yeelan howl galo ay ciidamada wadeen.
Weerarkan ayaa noqonaya kii u horeeyay oo London ka dhaca tan iyo bishii July sanadkii 2005 oo weeraro qaraxyo lala eegtay Boosteejada tareenka.
