Soomaaliya oo noqotay dalka ugu badan ee Bariga Afrika u geeriyooday Coronavirus

Sida ay maanta xaqiijiyay Wasaaradda Caafimaadka ee Dowladda Federaalka Soomaaliya, waxaa 24-kii saac ee ugu dambeeyay geeriyooday 5 ruux oo ka mid ah dadkii laga helay cudurka COVID-19, waxaana soo kordhay 46 xaaladood oo cusub.

Shan kamid ah xaaladaha cusub waxaa laga diiwaan geliyay deegaannada dowlad gobaleedka Puntiland, 41-ka kale waxay ku suganyihiin gobalka Banaadir. 33 kamid ah waa rag, 13-ka kalana waa haween.

Wasiirka Caafimaadka iyo Daryeelka Bulshada XFS, Marwo Fowziya Abiikar Nuur, ayaa caddeysay in tirada guud ee xaaladaha COVID-19 ee dalka laga diiwaan geliyay ay noqdeen 436 oo ruux, tirada bukaannada u geeriyooday cudurkana ay gaareen 23 oo qofood.

Dhanka kale, Wasiirka caafimaadka oo sheegtay in dowladdu ay ku howlantahay inay dalka kusoo celiso mawaadiniin Soomaaliyeed oo ku xayiran Sucuudiga iyo dalal kale, ayaa sidoo kale xaqiijisay in lala soconeyso xaaladda mawaadiniin ku xayirnaa dalka Turkiga oo xalay dalka dib loogu soo celiyay.

Soomaaliya ayaa haatan noqotay dalka ugu badan ee Bariga Afrika u geeriyooday cudurka Coronavirus, marka loo barbar dhigo dalalka kale Suudaan ayaa ku soo xigta oo u dhimatay 17 ruux.