Wararkii ugu dambeeyay Wabiga Shabeelle oo ku fatahay Xaafado ka tirsan Beledweyne

Wabiga Shabeelle ayaa saacadihii la soo dhaafay ku fatahay xaafado ka tirsan magaalada Beledweyne, iyadoo uu bilowday barakac ay sameynayaan dadka deegaanka.

Fatahaada ayaa ka dambeysay, kaddib markii roobab ay ka da’een deegaano dhowr ah, isla markaana wabiga uu aad u biyo keenay, taasoo keentay inuu karkaarada jabsado.

Xaafadaha uu Wabiga ku fatahay ayaa waxaa kamid ah Xarunta Lama galaay oo ay degan yihiin dhammaan Waaxyaha Maamulka, Xaafada Kooshin, Kutiinbo iyo Raadeerka.

Wararka ayaa sheegaya in dad badan ay ka barakaceen xaafadaha, kuwaasoo aaday dhinaca deegaanka Ceel Jaale ee duleedka Beledweyne.

Maalmihii la soo dhaafay ayaa waxaa socday dadaalo xooggan oo lagu moosayo jiinka wabiga, si aanu wabiga uga soo fatihin, waxaana loo dhigayay carro tuur badan halkii wabiga ka jabsado, waxaana muuqata in xowliga biyaha ay ku socdaan la celin la’yahay, taasna ay keentay in xaafado dhowr ah inay biyaha soo galaan.

Maamulka Gobolka Hiiraan iyo Guddiga Gurmadka magaalada Beledweyne ayaa ku adkeysanayey inaan magaalada laga barakicin oo la xaliyey fatahaaddii Wabiga, laakiin saaka waxaa ka muuqata magaalada inay xaalad adag ka jirto oo wabiga uu daad xoog leh saameeyay.