Safiirkii hore Soomaaliya ee dalka Ciraaq oo Muqdisho ku geeriyooday

Allaha u naxariistee waxaa saaka magaalada Muqdisho ku geeriyooday Amb. Ciise Cali Maxamed oo ku magac dheeraa (Ciise Dheere), kaas oo ahaa diblumaasi ka tirsanaa wasaaradda arrimaha dibadda ee xukuumadda Soomaaliya.

Marxuumka oo maalmihii dambe ku xanuunsanaa magaalada Muqdisho ayaa saaka geeriyooday, sida ay xaqiijiyeen qaar ka mid ah ehelladiisa.

Ma shaacin ehelladu nooca xanuunka ee uu u geeriyooday maxruum Ciise Cali Maxamed oo la soo shaqeeyey dowladdii dhexe.

Sidoo kale waxaa geeridiisa ka tacsiyeeyey mas’uuliyiin ka tirsan dowladda Federaalka ah Soomaaliya iyo kuwa hore xilal uga soo qabtay dalka, iyaga oo Alle uga baryey inuu ka waraabiyo Jannatul Firdowso.

AUN Amb. Ciise Dheere ayaa ahaa diblumaasi ku dhawaad 50 sanno ku dhex jiray diblamaasiyadda si gaar ah arrimaha carabta, isaga oo dowladdii dhexe noqday safiirkii Soomaaliya u fadhiyey dalka Ciraaq.