Maraykanka oo duqeyn dhinaca cirka ah ka fuliyey gobolka Shabeellaha Hoose

Taliska ciidamada Mareykanka ee Afrika (AFRICOM) iyo Dowladda Soomaaliya ayaa shaaciyey duqeyn cirka ah oo ka dhacday deegaan ka tirsan Gobolka Sh/Hoose.

Dayuurad ay leeyihiin ciidamada Maraykanka ayaa gantaalo ku weerartay Bar kontrol oo Alshabaab ku leeyihiin degaanka Hantiwadaag ee gobolka Sh/Hoose.

Qoraal ka soo baxay taliska ciidamada Maraykanka ayaa lagu shaaciyay in duqeyntaas lagu dilay mid ka mid ah dagaalyahanada Al-shabaab iyadoo lagu burburiyey bartii Alshabaab ku lahayd halkaasi oo la sheegay inay ku dhibi jireen dadka ku socdaala wadadda u dhaxeysa Muqdisho iyo Sh/Hoose, loogana qaadi jiray lacago sharci daro ah sida warka loo dhigay.

Taliska AFRICOM iyo Dowladda Federaalka ayaa sheegay in duqeyntan aysan wax waxyeelo ah kasoo gaarin dadka shacabka ah ee halkaas ku nool.