Booliska gobolka Banaadir oo ka hadlay qaraxyo laga maqlay caawa magaalada Muqdisho

Ciidanka Booliska gobolka Banaadir ayaa sheegay in qaraxyo laga maqlay caawa qeybo ka mid ah magaalada Muqdisho ay ahaayeen qaraxyo Dheemis ah oo baaritaan lagu sameynayo.

Afhayeenka Booliska gobolka Banaadir  Gaashaanle Sadiiq Aadan Cali ayaa warbaahinta u sheegay in abaare 8:20pm waqtiga Muqdisho ay maleeshiyada argagixisada ah ee Al-shabaab ay si dhuumaalaysi ah ku tuureen ilaa 4-qarax oo ka samaysan baaruud Dheemish ah oo aan gaysan wax qasaare ah.

Waxa uu sheegay inay baaritaan ku hayaan kooxda abuurtay cabsi galinta, islamarkaana Boolisku ay qaadayaan tallaabooyin amniga lagu xoojinayo.

Degmada Boondheere ayey ku soo dhaceen qaraxyadaasi Dheemishka, waxaana Boolisku saxaafadda ugu yeeray inay tusiyaan cadaymaha muujinaya in qaraxyadu ahaayeen kuwa aan rasmi ahayn.