Cali Guudlaawe oo la kulmay Danjiraha Ingiriiska ee dalka Soomaaliya

May 01 (Jowhar.com)-Madaxweynaha Dowladda Hirshabeelle mudane Cali Cabdullaahi Xuseen (Cali Guudlaawe) ayaa maanta kulan kula qaatay magaalada Muqdisho safiirka Dowladda Ingiriiska u fadhiyo Soomaaliya Danjire Mike Nithavrianakis oo ay ka wada hadleen arrimo dhowr ah.

Inta uu kulanka socday Madaxweynaha iyo Danjiraha ayaa iska wareystay arrimaha amniga, xasilinta, barnaamijyada horumarinta dhaqaallaha, dowlad-dhiska iyo guullaha Dowladda Hirshabeelle oo kaashaneyso ciidamada qalabka sida iyo saaxiibada Soomaaliya ay ka gaartay dagaalka lagula jiro kooxda Alshabaab.

Sidoo kale waxaa kulanka lagu gorfeeyay howgalada socda iyo wejiga 2-aad ee lagu ciribtirayo kooxda Khawaarijta.

“Dowladda Ingiriiska waxaan uga mahadcelinayaa dadaallada ay ku bixineyso soo af-jirada Khawaarijta iyo barnaamijyada horumarineed ay ka wado guud ahaan Soomaaliya gaar ahaan Hirshabeelle.”

Ugu dambeyn Madaxweynaha Dowladda Hirshabeelle mudane Cali Cabdullaahi Xuseen (Cali Guudlaawe) ayaa kaga mahadceliyay Danjiraha Dowladda Ingiriiska u joogo Soomaaliya shirkii maanta ee is xog-wareysiga ahaa.

This website uses cookies to improve your experience. We'll assume you're ok with this, but you can opt-out if you wish. Accept Read More