Faahfaahin ka soo baxaysa dad lagu diley wadanka Maraykanka

Illaa Siddeed qof oo u badnaa haween asal ahaan ka soo jeeday Asia ayaa lagu dilay toogasho ka dhacday saddex goobood oo ku taal gobolka Georgia ee dalka Mareykanka sida ay xaqiijiyeen hey’adaha amniga ee gobolkaas.

Toogashadan ayaa imaaneysaa maalmo yar kadib markii madaxweynaha Mareykanka Joe Biden uu cambaareeyay kororka dambiyada naceybka ah ee ka dhan ah dadka Americanka ah ee asal ahaan ka soo jeeda Asia.

Kooxaha u dooda xuquuqda madaniga ah ayaa sheegay in kororka naceykan uu qeyb weyn ka qaatay madaxweynihii hore ee Mareykanka Donald Trump , maadaama uu si joogta ah cudurka Coronavirus ugu yeeri jiray China Virus.

Booliska ayaa sheegay in la qabtay Robert Aaron Long oo 21-jir ah oo ku eedeysan dilka dadkan, waxayna sheegeen in kasta oo aysan heyn xog ku saabsan ujeedada dilkan, hadana ay baari doonaan.

Afhayeen u hadley hey’adda dambi baarista ee FBI ayaa sheegay inay caawin doonaan booliska Atlanta, waxaana boolisku ay sheegeen inay xoojin doonaan goobaha laga yaabo inay ka dhacaan weerarada nuucan ah.