Maxkamada ciidamada Puntland oo xukuno ku ridey rag ka tirsan Daacish

xukun-daacish

Maxkamadda Ciidamada ee Puntland ayaa xukunno dil iyo xarig isugu jira ku ridey rag lagu soo eedeeyay inay ka tirsan yihiin Al-Shabaab iyo Daacish.

Raggaas oo gaarayay ilaa iyo saddex nin ayaa la sheegay in ciidanka Puntland ay u soo qabteen falal isugu jiray dil iyo wax loogu yeero argagaxisinimo, waxaana maxkamadeyntooda ay ka dhacday magaalada Boosaaso ee Gobolka Bari.

Gududdoomiyaha Maxkamadda Ciidamada Qalabka Sida ee Gobolada Bari, Sanaag, Hayland, Karkaar iyo Gardafuu Ibraahim Bile Maxamed ayaa sheegay laba mid ah raggaas lagu riday Xukun dil toogasho ah.

Magacyada laba nin ayaa lagu sheegay Aadan Maxamed Xasan iyo Abshir Maxamed Candiraxmaan Tooshle, kuwaasi oo lagu eedeeyay in deegaano ka tirsan Puntland ay ka geysteen dilal kala duwan, lana qabtay.

Ugu dambeyn Guddoomiyaha Maxkamadda Ciidamada Qalabka Sida ee Gobolada Bari ayaa sheegay in eedeysanaha Saddexaad oo lagu magacaabo Maxamuud Shiniyow Cali lagu riday xukun ah 20 sano oo xabsi ah.