Ururka Al-shabaab ayaa deeganka Fiidow oo ka tirsan gobolka Sh/dhexe ku toogatay shalay oday 82 sano jir ah oo ka tirsanaa maamulka degmada Jowhar.

Cali Cabdulaahi Xasan ayaa maxkamad ku taal deeganka Fiidow ku xukuntay dil kadib markii uu u tegey halkaa inuu marqaati u noqdo mid ka mid ah labo qoys oo isku haystay dhul.

Qoyskii uu ku marqaati furayay ayaa u sheegay garsoorihii maxkamada in Cali Cabdullaahi uu yahay mas’uul ka tirsan maamulka degmada Jowhar sidaa awgeedna uusan ka marag furi karin dacwada.

Al-Shabaab ayaa xabsiga dhigtey kadibna maxkamad gaar ah saartay iyadoo lagu xukumay dil toogasho ah.  Cali Cabdulaahi Xasan ayaa ahaa guddoomiyaha xaafadda Buula Sheekh ee magaalada Jowhar.

Deegaanka Fiidow oo ku tirsan gobolka Sh/dhexe ayaa ku taal dacwad ay dadka ku nool magaalada Jowhar u tagaan garsoor,waxaana halkaa lagu kala xukumiyaa dacwado u badan ishaysadka xagga dhulka ah.