Wararka ka imaanaya Gobolka Siti ee dowlad deegaanka Soomaalida ee dalka Itoobiya ayaa sheegaya in 11 ruux oo shacab ah la dilay, halka tiro kalena la dhaawacay, kaddib markii kooxo hubeysan ay rasaas ku fureen dadkaas.

Wasiirka Warfaafinta dowlad deegaanka Soomaalida Itoobiya C/llaahi Maxamed Mowliid ayaa sheegay in dilkan ay geysteen dhalinyaro hubeysan oo ka soo jeeda Qowmiyadda Cafarta oo ka mid ah dadka degan Gobolka Siti ee dowlad deegaanka Soomaalida.

Falkan ayaa salka ku ku haya dhul la isku heysto oo muddooyinkii u dambeeyay soo jiitamayay, waxaana Wasiirku sheegay in si sharci ah loogu kala bixi doono dhulkaas cidii yeelata lagu wareejin doono.

Sidoo kale waxaa uu sheegay Wasiirka in wax laga qaban doono arrimahan oo ku soo noq-noqday deegaanka, isla markaana xiisadaha la xiriira dhulalka la isku heysto laga gaari doono xal.

Sanadihii u dambeeyay ayaa waxaa jiray xiisado u dhaxeeyay qowmiyadaha Soomaalida iyo Oromada, waxaana xiisadahaas ka dhashay dhimasho iyo dhaawac oo labada dhinac soo kala gaaray