Waxaa maalintii labaad galay Shirweynaha Qaran ee Soo-bandhigidda iyo Xaqiijinta Hannaanka Dhab-u-heshiinta Qaran, kaasi oo ay soo qaban qaabisay Wasaaradda Arrimaha Gudaha, Federaalka iyo Dib-u-heshiisiinta Qaranka, waxaana kasoo qeyb galay wakiilo ka kala socdo Maamul goboleed-yada, Gobalka Banaadir iyo qeybaha kala duwan ee bulshada.

Shirka oo shalay furmay ayaa maanta looga dooday natiijooyinka kasoo baxay wadatashiyo hore loogu qabtay dhamaan dowlad goboleedyada dalka iyo Gobalka Banaadir, waxaana ka mid ahaa 14-Wadatashi oo Wasaaradda Arrimaha Gudaha ku qabatay Magaalooyinka Muqdisho, Garowe, Kismaayo, Dhuuso-mareeb, Jowhar iyo Baydhabo, kuwaasi oo ay ka qeyb galeen in ka badan 700-qof,.

Talooyin laga uruuriyay dad kor u dhaafaya 250 qof ayaa waxay qaarkood soo jeediyeen Siyaasad cad oo lagu wajihi karo Dhab-u-heshiin Bulsho oo u gogol xaareysa in dadka wax kala tabanaya ay iscafiyaan.

Maalinta Birito ayaa lagu wadaa in shirka la soo xiro, islamarkaana lagu soo bandhigo natiijada aragtiyada wax dhisaya ee ay isdhaafsadeen ka soo qeyb galayaasha oo matalaya dhamaan bulshada Soomaaliyeed.