Maxaa ka jiro in heshiis xabad joojin ah laga gaaray dagaalka Israel iyo Xamaas?

Oct 16 (Jowhar.com)-Masar, Israa’iil iyo Mareykanka ayaa lagu warramaya inay gaareen heshiis xabbad-joojin kumeel-gaar ah oo billaabanaysa 9-ka subaxnimo, sida ay sheegtay Reuters oo xigatay labo Ilo amni oo Masaari ah.

Xamaas, ayaa dhankeeda sheegtay inaysan war u hayn heshiiskaa oo la filayo inuu suuragaliyo gargaarkii u horreeya oo la soo gaarsiiyo Qaza, balse waxa ay dooneyso Israa’iil ayaa ah in gargaarka lagu ekeeyo kaliya koonfurta Qaza oo isla xabbad-joojinta ay doonayaan inay ka dhaqangeliyaan.

Safaaradda Mareykanka ee Israa’iil ayaa sheegtay surtagalnimada 9-ka subaxnimo ee Isniinta maanta in la furi doono xadka Rafah ee Masar iyo Qaza, wallow la sheegay inay marxada halkaa ka jirta aysan caddeyn oo isbed-beddel uu ku dhici karo.

Boqollaal gaadiid oo u sida gurmad Qaza, ayaa halkaa ku sugan maalmo, halka boqollaal ajaaniib iyo falastiini jinsiyado kale heysta ay doonayaan inay ka gudbaan.