Ciidamada Galmudug oo dagaal kula wareegay deegaanka Sangooye iyo khasaaraha ka dhashay.
May 14 (Jowhar.com)- Warar dheeraad ah ayaa ka soo baxaya dagaal xooggan oo saaka duleedka magaalada Dhuusa-mareeb ku dhexmaray ciidamadda Galmudug oo garab ka helaya kuwa dowladda iyo ciidanka kooxda Ahlu-Suna, iyadoo weerarka saaka ay qaadeen ciidanka is garabsanayay.
Wararka la helayo ayaa sheegaya in kooxda Ahlu-Suna laga qabsaday deegaanka Sangooye, halkaasoo ay fariisimo iyo difaacyo ay ka qoteen ciidankii shalay laga saaray magaalada Dhuusa-Mareeb, iyadoo dagaalka saaka uu ahaa mid aad u culus oo la isu adeegsaday hubka noocyadiisa kala duwan, waxaana jira khasaare kala gaaray dhinacyada dagaalamay iyo qaar kamid ah dadkii ku safrayay halka dirirta ay ka dhacday.
Saraakiil u hadashay dhanka Galmudug waxey sheegeen iney gacanta ku dhigeen gaari Cabdi Bile ah iyo saanad ciidan oo ay isaga carareen kooxda Ahlu-Suna, iyagoo ku hanjabay iney si toos ah u aadi doonaan dhinaca deegaanka Bohol oo ah halka ugu badan ee laga soo qaado weerarada ka yimaada dhanka kooxdan bishii October ee sanadkii 2021-kii dagaalka culus looga saaray degmada Guriceel oo ay muddo kooban haysteen.
Si kastaba, Dagaalladan ayaa kusoo aadaya, iyadoo Madaxweynaha Galmudug iyo kuxigeenkiisa ay labaduba ku suganyihiin magaalada Muqdisho, halkaas oo ay qeyb ka yihiin ololaha doorashada madaxweynaha Soomaaliya oo dhici doonta maalinta beri ee ah 15-ka May, iyagoo ka mashquulay shaqadii loo doortay ee eheyd hoggaaminta maamulka Galmudug.
Dhinaca kalena, waxaa maanta xaalad deganaan ah laga dareemayaa magaalada Dhuusa-Mareeb, iyadoo Dhaq-dhaqaaqa dadka iyo gaadiidka uu sidoo kale yahay mid yar, waxaana magaalada weli laga dareemayaa cabsi la xiriirta in markale ay ku dagaalamaaan labada dhinac.
