Kooxda Afgambiga ku qabsatay Niger oo xirey hawada dalkaas
Aug. 07 (Jowhar.com)-Hogaamiyaasha afgambiga Niger ayaa xiray hawada dalkaasi kadib markii ay diideen amar ka soo baxay wadamada Galbeedka Afrika oo ahaa in dib loo soo celiyo madaxweynihii xilka laga tuuray ee Mohamed Bazoum ama la faragelin doono.
Talaabadan, ayaa lagu dhawaaqay galinkii dambe ee Axadii, iyadoo tobanaan kun oo taageerayaasha afgambiga ah ay isugu soo baxeen garoon ku yaala caasimadda Niger, Niamey, si ay ugu farxaan jeneraalada qabsaday awoodda ama Golaha Qaranka ee Badbaadada Guriga (CNSP).
War qoraal ah oo laga akhriyay telefiishanka qaranka ayuu Abdramane ku sheegay in ay jireen ciidamo horudhac ah oo la geeyay laba dal oo Afrikada dhexe ah, kuwaas oo isku diyaarinaya faragelin, balse ma uusan bixin faahfaahin.
“Marka la eego khatarta faragelinta, taas oo sii caddaanaysa diyaarinta dalalka deriska ah, hawada Niger ayaa xiran diyaaradaha laga bilaabo maanta ilaa ogeysiis kale,” ayuu yidhi.
“Ciidanka qalabka sida ee Niger iyo dhammaan difaacyadayada iyo ciidamada amniga, oo ay taageerayaan taageerada dadkeena, waxay diyaar u yihiin inay difaacaan sharafta dhulkeena,” ayuu raaciyay.
Afgambigii ka dhacay dalka Niger 26-kii July ayaa noqonaya kii toddobaad ee ka dhaca Galbeedka iyo Bartamaha Afrika muddo saddex sano ah.
Waxa ay ruxday gobolka Saaxil ee galbeedka Afrika, kaas oo ay kula dagaallamayaan kooxaha hubaysan ee xiriirka la leh al-Qaacida iyo ISIL (ISIS) oo ka mid ah meelaha ugu saboolsan adduunka.
ECOWAS ayaa dhaleeceysay afgambiga, waxayna ku soo rogtay cunaqabatayn dhaqaale iyo mid socdaal, oo ay ku jirto inay jarto korontada Niger.
Madaxda difaaca ee ururka ayaa ku heshiiyey qorshe hawleed milatari oo suurtagal ah, oo ay ku jiraan goorta iyo meesha laga duulayo haddii aan la sii dayn hoggaamiyaha dalkaas ee xiran oo aan dib loo soo celin Axaddii shalay ahayd.
ECOWAS ma aysan sheegin tillaabooyinka xiga ee ay qaadi doonto ama goorta saxda ah ee Axadda uu ku eg yahay waqtiga kama dambaysta ah.
