Ku dhawaad 3,000 oo caruur ah oo lagu dilay weerarrada Israel ee Gaza tan iyo 7-dii Oktoobar.
Oct 26 (Jowhar.com)-Ku dhawaad 3,000 oo caruur ah ayaa lagu dilay weerarrada Israel ee Gaza halka ay ku dhaawacmeen 5,364 oo kale,tan iyo 7-dii Oktoobar iyadoo tiro intaa ka badana ay ku dhaawacmeen.
Tiro aad u tiro badan oo aan qaan-gaarin ayaa la barakiciyay kuwaasoo ay la’yihiin waalidiin iyo xubno qoys oo lagu dilay duqeymaha aan joogsiga lahayn ee Israa’iil ay ku hayso dhulka go’doonsan.
Hay’adda Qaramada Midoobay u qaabilsan carruurta ee UNICEF ayaa dhalleeceysay tirada carruurta ku dhimatay iyo kuwa ku dhaawacantay Qaza.
UNICEF waxa ay ku baaqday xabbad-joojin degdeg ah iyo helitaan joogto ah oo aan caqabad lahayn oo gargaar bini’aadantinimo ah.
7-dii Oktoobar, kooxda Falastiiniyiinta ee Xamaas ayaa weeraro lama filaan ah ku qaaday Israa’iil, kuwaas oo ay ku dhinteen in ka badan 1,400 oo qof.
Ciidamada Israa’iil ayaa tan iyo xilligaas ay si aan kala joogsi lahayn u duqeeynayeen Gaza, iyagoo dilay ugu yaraan 6,791 qof.
Warsaxaafadeed ay si wada jir ah u soo saareen wasiirada arrimaha dibadda ee dalalka Bahrain, Masar, Jordan, Kuwait, Morocco, Oman, Qatar, Saudi Arabia iyo Imaaraadka Carabta ayaa sidoo kale waxa ay ku sheegeen in xuquuqda is-difaacidda aysan sabab u ahayn jabinta sharciga iyo in la dayaco xuquuqda Falastiiniyiinta. .
Waxay sidoo kale cambaareeyeen waxa ay ku tilmaameen barakicinta qasabka ah iyo ciqaabta wadajirka ah ee marinka Gaza.
Madaxweynaha Ruushka Vladimir Putin ayaa ka digay in dagaalka Israa’iil ee Gaza uu ku fido bariga dhexe, isagoo sheegay inay khalad tahay in haweenka, carruurta iyo dadka da’da ah ee aan waxba galabsan ee Falastiiniyiinta lagu ciqaabo dambiyada dadka kale.
