Dowlada Itoobiya oo ku dhawaaqday xabbad joojin iskeed ah gobolka Tigray
Mar 24 (Jowhar.com)-Dowladda Itoobiya ayaa ku dhawaaqday xabbad-joojin bini’aadantinimo si gargaarka degdegga ah ee la gaarsiinayo gobolka Tigray, halkaasoo boqolaal kun ay wajahayaan gaajo.
Tan iyo markii uu dagaalku ka qarxay waqooyiga Itoobiya bishii Noofambar 2020, kumannaan qof ayaa ku dhintay, malaayiin kalena waa ku barakaceen iyadoo colaaddu ay ka bilaabatay Tigray ilaa gobollada deriska la ah ee Axmaarada iyo Canfarta.
Ra’iisul wasaare Abiy Axmed ayaa sheegay in dowladdiisu ay ka go’an in ay ku bixiso dadaalka ugu badan si loo fududeeyo qulqulka gargaarka bini’aadantinimo ee gobolka Tigray.
Afhayeenka dowladda Legesse Tulu ayaa u sheegay wakaaladda wararka ee Reuters in xabbad joojintu ay tahay mid hal dhinac ah.
Dhinaca kale wax war ah kama soo bixin ciidamada Tigreega sida ay ka yeelayaan xabad joojinta ay ku dhawaaqday xukuumada Itoobiya.
Warkan ka soo baxay xukuumada Itoobiya ayaa yimid kadib markii uu toddobaadkan booqday magaalada Addis Ababa ergayga gaarka ah ee Mareykanka u qaabilsan Geeska Afrika, David Satterfield.
In ka badan 400,000 oo qof ayaa ku barokacay gobolka uu dagaalku ka socdo ee waqooyiga gobolka Tigray, sida ay sheegtay Qaramada Midoobay.
Hay’adda Qaramada Midoobay u qaabilsan bini’aadantinimada ee OCHA ayaa sheegtay in aanay jirin wax baabuur ah oo soo galay Tigray tan iyo 15-kii Diseembar.
OCHA waxay sheegtay in dadaalka gargaarka uu caqabad ku yahay dhaqaale la’aan, sahay iyo la-hawlgalayaal la’aan.
Mareykanka ayaa ku eedeeyay xukuumadda Abiy in ay ka hortageyso in gargaar la gaarsiiyo dadka u baahan, halka mas’uuliyiinta ay iyaguna ku eedeeyeen mucaaradka inay mas’uul ka yihiin carqaladeynta.
Ku dhawaad 40 boqolkiiba dadka ku nool Tigray, oo ah gobol ay ku nool yihiin lix milyan oo qof, ayaa wajahaya cunto la’aan aad u daran sida ay sheegtay Qaramada Midoobay.
