Laftagareen oo maanta furay Kalfadhiga lixaad ee Baarlamaanka Koonfur Galbeed
Aug. 08 (Jowhar.com)- Dowladda Koonfur Galbeed Mudane Cabdicasiis Xasan Maxamed Laftagareen ayaa furay kal-fadhiga 6aad ee Baarlamaanka 2aad ee Dowladda Koonfur Galbeed.
Madaxwaynaha oo jeedinayay khudbadda dastuuriga ah ee furitaanka kalfadhiga ayaa adkeeyay muhiimadda ay leedahay in laamaha kala duwan ee dowladda ay si wada jir ah uga mira dhaliyaan hawlaha horyaalla si loo xaqiijiyo himilada shacabka Koonfur Galbeed.
Madaxwayne Laftagareen ayaa Golaha Wakiilada uga warbixiyey waxqabadkii dowladda, Dhinacyada Amniga, Dhaqaalaha, Dhismaha Goliyaasha Degmooyinka, Hirgelinta Mashaariicda Hormarineed ee loogu Adeegayo Bulshada iyo sidii si Wadajir ah looga qeybqadan lahaa Wajiga 2aad ee Dagaalka Dalka lagaga Saarayo Khawaarijta Alshabaab.
Madaxweyne Laftagareen ayaa qiray in Golaha Wakiilada hawlo aad u culus ay horyaallaan, ayna dowladda xoogga saari doonto sidii loo xaqiijin lahaa xasilinta amniga deeganada Koonfur Galbeed, dib u habeynta garsoorka, dib-u-dhiska kaabayaasha dhaqaalaha, iyo Hirgelinta Adeegyada ay ubaahanyihiin Bulshada Koonfur Galbeed.
