Mareykanka, Qatar iyo Ingiriiska oo $10.5 million ugu deeqay Soomaaliya, si abaarta wax looga qabto
Jun. 05 (Jowhar.com)-Lacag dhan 10.5 milyan oo doolar oo gargaar abaaraha iyo u adkeysiga ah ayaa loogu deeqayaa Soomaaliya iyadoo ay iska kaashanayaan Sanduuqa Horumarinta Qatar, Hay’adda Horumarinta Caalamiga ah ee Mareykanka iyo Safaaradda Ingiriiska ee Muqdisho.
Iskaashigan saddex geesoodka ah ayaa la doonayaa in looga hortagga macluusha Soomaaliya iyo wax ka qabashada saamayntii ka dhalatay abaarahii Soomaaliya ku dhuftay sanadihii 2021 iyo 2022.
Lacagta ayaa qorshaha yahay in wax looga qabto arrimaha gargaarka Soomaaliya oo ay ku dhufteen abaaro daran, taasoo ay sii dheer tahay colaadaha ka jira deegaanada qaar oo ay dad badani isaga soo hayaameen.
Ilaa 6.6 milyan oo qof oo Soomaaliya ku nool ayaa heysata cunto yari aad u daran taasoo ay ugu wacan tahay abaar daran oo ay uga sii dartay rabshado.
In ka badan saddex milyan oo qof ayaa barakacay tan iyo bishii Jannaayo ee sannadkii hore.