Xuseen Sheekh oo iska casilay xilka Agaasimaha madaxtooyada Soomaaliya
Aug. 13 (Jowhar.com)-Agaasimihii guud ee madaxtooyada Soomaaliya Xuseen Sheekh Maxanuud ayaa ku dhawaaqay inuu iska casilay xilkaasi, sida uu ku yiri qoraal uu gorodhow soo saaray.
“Marka hore waxaan umadda Soomaaliyeed la wadaagayaa in aan si rasmi ah isaga casilay xilka Agaasimaha Guud ee Madaxtooyada Jamhuuriyadda Federaalka Soomaaliya oo aan haayay laga soo billaabo 23 May, 2022” ayuu yiri.
Sababta ayuu ku sheegay iney la xiriirto damaciisa ku aadan inuu u tartamo xilka madaxtinimo ee maamulka Koofur Galbeed oo dhawaan dhaceyso.
“Waxaan uga tagey xilkii Agaasimaha Madaxtooyada Soomaaliya kaddib markii uu igu xoogeystay dareen i weheshaday oo ah xaaladda Koonfur Galbeed Soomaaliya iyo markii aan in badan dhageystay tallooyinka shacab iyo siyaasiin badan gaar ahaan kuwa deegaanka, garowsadayna in ay lama huraan tahay inaan waqti dheeraad ah siiyo ka shaqeynta danaha dadka iyo deegaanka Koonfur Galbeed.
Taas oo aan aaminsanahay in ay u baahan tahay hoggaan leh lexejeclo, aqoon, ammaano, waayo-aragnimo iyo damiir ummadeed una horseeda deegaankaas horumar dhanka amniga, siyaasadda, dhaqaalaha iyo mid bulshaba leh, si looga faa’ideysto kheyraadka Alle ku manaystay Koonfur Galbeed islamarkaana ay hormuud ugu noqoto dalka intiisa kale” ayuu hadalkiisa kusii daray.
