May 20 (Jowhar)-Madaxweynaha maamulka Puntland, Sicid Deni ayaa maanta u amba-baxay dalka Itoobiya, halkaas oo uga sii gudbayo dalka Kenya.
Wararka ayaa intaasi kusii daraya in lagu wado in ay kulan gaar ah yeeshaan Madaxweynaha Jubbaland, Axmed Madoobe oo Nairobi ku sugan, sida ay tilmaamayaan ilo ka tirsan labada dhinac.
Kulamadan kadib, waxa ay labadooda isu sii raacayaan Imaaraadka Carabta oo labada dowlad-goboleedba saaxiib dhow la ah, iyadoo halkaasi lagu dhameystiri doonno khilaaf saddexdii sano ee lasoo dhaafay ka dhex taagnaa labadan madaxweyne.
Si kastaba, Xiriirka Puntland iyo Jubbaland ayaa la filayaa in uu dib u soo noqdo tan & doorashadii DFS, iyada oo markan Garoowe iyo Kismaayo ay midaysay tallaabooyinka xukuumadda Muqdisho.
Waxaa la saadaalinayaa in kulanka Imaaraadka Carabta lagu gorfeyn doono arrimo ay ka mid yihiin iskaashiga amniga, dhaqaalaha iyo sidii loo wajihi lahaa xiriirka dowladda federaalka Soomaaliya iyo maamul goboleedyada. Ilo-wareedyo ku dhow dhow labada dhinac ayaa sheegaya in la filayo in heshiis rasmi ah laga gaaro qodobbada muranka dhaliyay, kuwaas oo salka ku haya awood-qeybsiga, metelaadda siyaasadeed iyo qaab-dhismeedka dowladda dhexe.
Diblomaasiyiin ka tirsan Imaaraadka Carabta ayaa la filayaa inay garwadeen ka noqdaan wada-hadalka, si loo xoojiyo is fahamka labada madaxweyne, loona xaqiijiyo in Puntland iyo Jubbaland ay si mideysan ugu wajahaan arrimaha masiiriga ah ee horyaalla Soomaaliya.
Sidoo kale, wararka laga helayo Nairobi ayaa sheegaya in kulankan uu saameyn ku yeelan karo wadashaqeynta mustaqbalka ee maamul goboleedyada, gaar ahaan marka la eego qorshaha dib-u-heshiisiinta iyo dhismaha hay’adaha dowladda federaalka.
Ugu dambeyn, safarkan waxaa indhaha lagu hayaa natiijada kasoo baxda, iyadoo la rumeysan yahay in xiriir cusub oo xooggan laga dhex abuuri karo Puntland iyo Jubbaland, taas oo saameyn ku yeelan karta siyaasadda guud ee dalka, xilli ay socdaan dadaallo dib loogu dhisayo kalsoonida dowlad-goboleedyada iyo dowladda dhexe.
