May 25 (Jowhar)- Madaxa Qaramada Midoobay Antonio Guterres ayaa sheegay in Israa’iil ay ogolaatay oo kaliya “qaado mugeed” oo gargaar ah in la geeyo Gaza, xilli xaaladda bini’aadantinimo ee halkaas ay sii xumaanayso. Guterres wuxuu ku baaqay in la kordhiyo gargaarka la gaarsiinayo Gaza, isagoo sheegay in tirada xamuulka la ogolyahay aysan waxba ka bedelayn baahida weyn ee ka jirta degaankaas.
Wuxuu intaas ku daray in xannibaadaha ka jirta xuduudaha ay caqabad weyn ku yihiin gaarsiinta raashiinka, biyaha, iyo daawooyinka ay dadka reer Gaza aad ugu baahan yihiin.
“Xaaladdu waxay mareysaa meel aad u halis ah, dadka rayidka ah ee Gaza waxay wajahaan macluul iyo dhibaatooyin aan horay loo arag,” ayuu yiri Guterres.
Hay’adaha gargaarka ayaa sidoo kale soo saaray digniino la mid ah, waxayna sheegeen in xitaa haddii la furo marinada gargaarka, baahida jira ay tahay mid aad uga weyn inta la keeno maalin kasta.
Dowladda Israa’iil ayaa dhankeeda sheegtay in arrimaha amniga ay weli mudnaanta siineyso, balse cadaadiska caalamiga ah ee lagu doonayo in la fududeeyo gargaarka ayaa sii kordhaya.
